|
Xen Congrès
de l'Associacion Internacionala
d'Estudis Occitans
Lo congrès de
l'Associacion Internacionala d'Estudis Occitans n'arriba a la sieu
desena edicion, e nos farà gaug per aquesta escasença de vos aculhir a
Besièrs, una ciutat simbolica per l'occitanisme, luòc d'un dels
episòdis mai tragics de l'istòria de l'espandi occitan, una vila qu'a
sauput servar sègle per sègle lo sieu estacament a la cultura e a la
lenga d'òc e que son occitanitat, la mòstra uèi sens trantalhar. Lo Xen
Congrés se tendrà cinc ans aprèp la manifestacion granda de defensa de
la lenga d'òc qu'a Besièrs acampèt 20 000 personas, e mostrèt que
l'eiretatge dels Trobadors a fach camin fins al sègle XXI.
Volèm qu'aqueste Xen
Congrès siá l'escasença de rendre omenatge a totes los que, demercé
lors activitats de cercaires, d'artistas, d'escriveires, d'editors, de
cantaires, d'ensenhaires, de militants... o simpletament coma parlaires
de la lenga an permés qu'aquela lenga occitana siá encara viva al
tresen millenari. E farem tot çò que cal per que la setmana que sètz
per passar a Besièrs siá a l'un còp l'escasença per presentar e
discutir de recèrcas de nauçada granda sul domeni d'òc, e per mostrar
la vitalitat d'aquela lenga e d'aquela cultura. Segur qu'es l'occitan
un objècte d'estudi, mas tanben es una lenga qu'encara se parla, se
canta, s'escriu, s'ensenha.
Aital avèm causit per tèma del Congrès:
Los que fan viure e treslusir l'occitan
|
